AMRI ZA MUNGU

AMRI KUMI ZA MUNGU - UPENDO

Kutoka 20:3-17

Mpende Bwana Mungu wako, Kwa moyo wako wote, na Kwa Roho yako yote, na akili zako zote. Mathayo 22:37       [Upendo kati ya Mwanadamu na Mungu] 1 Usiwe na Miungu mingine ila mimi 2 Usijifanyie sanamu ya kuchonga, wala mfano wa kitu chochote kilicho juu mbinguni, wala kilicho chini duniani, wala kilicho majini chini ya dunia. Usivisujudie wala kuvitumikia; kwa kuwa mimi, Bwana, Mungu wako, ni Mungu mwenye wivu; nawapatiliza wana maovu ya baba zao, hata kizazi cha tatu na cha nne cha wanichukiao, name nwarehemu maelfu elfu wanipendao, na kuzishika Amri zangu 3 Usilitaje bure jina la BWANA, Mungu wako, maana Bwana hatamhesabia kuwa hana hatia mtu alitajaye jina lake bure 4 Ikumbuke siku ya sabato uitakase. Siku sita fanya kazi, utende mambo yako yote, lakini siku ya saba ni sabato ya BWANA, Mungu wako, siku hiyo usifanye kazi yo yote, wewe, wala mwana wako, wala binti yako, wala mtumwa wako, wala mjakazi wako, wala mnyama wako wa kufuga, wala mgeni aliye ndani ya malango yako. Maana, kwa siku sita Bwana alifanya mbingu, na nchi, na bahari, na vyote vilivyomo, akastarehe siku ya Saba; kwa hiyo BWANA akaibarikia siku ya sabato akaitakasa.

Mpende Jirani yako kama nafsi yako. Mathayo 22:39 [Upendo kati ya Mwanadamu na Mwenzie] 5 Waheshimu baba yako na mama yako; siku zako zipate kuwa nyingi katika nchi upewayo na BWANA, Mungu wako. 6 Usiue 7 Usizini 8 Usiibe 9 Usimshuhudie jirani yako uongo 10 Usitamani nyumba ya jirani yako, usitamani mke wa jirani yako, wala mtumwa wake, wala mjakazi wake, wala ng’ombe wake, wala punda wake, wala chochote alicho nacho jirani yako.

ZILIANDIKWA KWA CHANDA CHA MUNGU - KUTOKA 31:18

UJUMBE KWA WATUMISHI WA MUNGU

Ujumbe  unatoka:  ISAYA 56:10-11,

Walinzi wake ni vipofu, wote pia hawana MAARIFA; wote ni mbwa walio bubu, hawawezi kulia; huota ndoto, hulala usingizi. Naam, mbwa hao wana choyo sana, hawashibi kamwe; na ni WACHUNGAJI wasioweza kufahamu NENO; wote pia wamegeuka upande, wazifuate njia zao wenyewe, kila mmoja kwa faida yake, toka pande zote.

tAFAKARI:

Giza nene la Kiroho linazidi kuisonga dunia yetu kwa sababu ya viongozi wa dini, na watu wengi sana wataangamia siku ya mwisho kwa sababu ya kupotoshwa na viongozi. Neno linasema “Watu wangu wanaangamizwa kwa kukosa maarifa; kwa kuwa wewe umeyakataa maarifa, mimi nami nitakukataa wewe, usiwe kuhani wangu mimi; kwa kuwa umeisahau Sheria ya Mungu wako, mimi nami nitawasahu watoto wako” Hosea 4:6. Kizazi chetu kiko kwenye hatari kubwa, kwani Shetani ametunga falsafa nyingi za uongo, juu ya kweli ya neno la Mungu.

Wapendwa! Amkeni pambazuko liko karibu, mnapoona Dini na Madhehebu mengi yakianzishwa huku kila mmoja akiwa na mafundisho tofauti na mengine yaliyo kinyume neno la Mungu; jueni unabii umetimia, ukibahatika kuufahamu ukweli, changamka amua kuufuata ukweli. Mungu anasema “Kwa maana wawaongozao watu hawa ndio wawakoseshao, na hao walioongozwa na watu hao wameangamia” Isaya 9:16. Hapa hakuna usalama, Wachungaji wasiojua kweli ya Mungu na Waumini wao wanaokubali chochote bila kuchunguza ukweli, wote wataangamia.

Ujumbe huu ni sauti ya Matengenezo kwa kila anayejiita Mtumishi, bila kujali cheo chake. Neno linasema; wachungaji wamekuwa ni sawa na Mbwa Bubu asiyebweka adui anapovamia zizi la kondoo, hebu jiulize – Inakuwaje Uovu unadumu kati ya waumini? Kama Mtumishi anazini na waumini, au ni mlevi, muuza madawa ya kulevya n.k. waumini watakuwaje? Tunaona, Kwa sababu ya Maslahi! wenye pesa makanisani na miskitini hawakemewi hata kama wanafanya Dhambi za wazi, Viongozi wamepofushwa macho kwa sababu ya Maslahi.

Ohoooo! Wapendwa; wakemeaji wa dhambi siku hizi wako wapi? Manabii na waonyaji, kama akina Isaya, yeremia, Hosea, Ezekiel n.k. wako wapi siku hizi? Mbona wote wamegeukia Injili ya UTAJIRI na Kujikusanyia watu wenye Pesa kwa ajili ya maslahi yao? Wakati wote wakifundisha Ujumbe laini, wakikazia - uponyaji, utajiri, Baraka, Kupanda mbegu, Zaka na sadaka, amani n.k. huku waumini wakidumu kwenye Dhambi na hatimaye kuingia kwenye maisha magumu zaidi ya walivyokuwa mwanzo. Katika historia ya Biblia hakuna Nabii wala Mtume aliyekuwa na Injili ya akijilimbikizia Mali za Dunia hii mbali na Kuonya na Kukemea dhambi.

Hebu jiulize: Je Ni kweli wewe umetumwa na unaongozwa na Mungu? Huo ulevi, Hiyo tamaa ya Ngono, huko kupenda Fedha na utajiri, Hiyo mipango unayoungana na Dini ya mashetani kupinga kweli ya Mungu, huo upendeleo kwa wenye Pesa na kudharau maskini, na hiyo nyumba ndogo, na huyo Bwana asiye mume wako, na hayo madawa ya kulevya na biashara haramu, na huo utapeli na udanganyifu, na huko kugombania madaraka na kufanya kampeni kama vyama vya siasa, hiyo michezo michafu ya kuchezea mabinti za watu, na hizo hirizi unazotumia kuvuta watu na kutenda miujiza ukihadaa roho za watu kwa jina la Upako, hizo hasira, chuki, visasi na Mambo yanayofanana na hayo; Unaamini yanatokana na Roho Mtakatifu? – Msidanganyike; Mungu anasema “Tokeni kwake (Shetani na Mpinga Kristo), enyi watu wangu, msishiriki Dhambi zake, wala msipokee mapigo yake” Ufunuo 18:4.

Mbwa mwitu wamevamia kundi, nani wa kusimama kupiga kelele, wakati utitili wa mafundisho potofu yaliyo kinyume na ukweli wa neno la Mungu yakiingia kanisani!  nani wa kutoa maonyo na kutengeneza? Neno linasema “Lihubiri NENO, uwe tayari, wakati ukufaao na wakati usiokufaa, KARIPIA, KEMEA, na KUONYA kwa uvumilivu wote na mafundisho. Maana utakuja wakati watakapoyakataa mafundsho yenye uzima … na kuzigeukia hadithi za Oungo” 2Timotheo 4:2-4. Neema imefunuliwa ili kutuweka HURU mbali na Dhambi, sio kuhalalisha dhambi, kama wengi wanavyodai, huku wakizidi kuzama katika matope ya Dhambi.

MUNGU ATUBARIKI SOTE TUNAPOENDELEA KUFANYA MATENGENEZO KABLA SAA MBAYA HAIJAFIKA.

Ev:  Eliezer Mwangosi.

AMRI YA 6 - USIUE

Ujumbe  unatoka:  Kutoka 20:13

Usiue.

tAFAKARI:

Katika jamii yetu, dhambi ya kuua ni kati ya makosa ya jinai, ambayo karibu kila mtu anaichukia. Lakini, mara nyingi utasikia watu wakisema “Ningelikuwa na uwezo ningemmaliza” na wengine wanawaendea wenzao kwa mafundi (wanganga) ili kupoteza uhai wao. Yesu alisema, “Mmesikia watu wa kale walivyoambiwa, Usiue; na mtu akiua, itampasa hukumu. Bali mimi nawambieni, kila amwoneaye ndugu yake hasira itampasa hukumu …” Mathayo 5:21-22.  Mungu anaangalia kilicho moyoni juu ya mtu mwingine.

Tendo lolote au hali yoyote inayosababisha kutoa uhai wa mtu, au kuleta hasira na ugomvi kati ya watu ni Dhambi ya kuua. kwa mfano: Kuingilia ndoa ya mtu na kusababisha familia kuteseka, Kuzua uongo ili kuleta chuki kati ya watu, Kutoa mimba au kusaidia kutoa mimba, kuua au kutupata watoto wachanga, mawazo ya hasira, kulipa visasi  na chuki juu ya wengine, moyo wa kutosamehe wanaowakosea, vinyongo, Kudhuru afya ya mtu kwa kumpa sumu au kumwendea kwa waganga n.k. Yote hayo ni uuaji. Mungu anasema “Kila amchukiaye ndugu yake ni MUUAJI: nanyi mnajua ya kuwa kila muuaji hana uzima wa milele ….” 1Yohana 3:15. Je kuna mtu yeyote Unamchukia? hata ukimuona anakukera?  Hiyo Sio salama. Mwambie Yesu akupatie Moyo wa kusamehe na Kusahau.

Uharamia mwingine wa mauaji ni pale unapomfanya mtu mwingine afe kiroho, yaani kumfanya atende dhambi. Mungu anajali zaidi Uhai wa kiroho kuliko wa kimwili, kwani mwili huu ni wa kitambo, Yesu alisema “Msiwaogope wauuao mwili, wasiweze kuiua na Roho; afadhali mwogopeni yule awezaye kuangamiza mwili na Roho pia katika Jehanamu” Mathayo 10:28,  “Mshahara wa dhambi ni mauti ….” Rumi 6:23. Swali kwa wasomaji; ni wangapi leo wanatuhumiwa kwa mauaji? Tafakari: Huyo unayemwita “My Sweet Heart” au “My Honey” bila kujali ni mchumba wako, nyumba ndogo, hawala n.k. unampenda kweli? Ni kweli hakuna DHAMBI (Mauti) inayoendelea kati yenu?. Mungu anatupenda, ndio maana anatuletea ujumbee huu ili TUPONE kabla Mlango wa Rehema haujafungwa.

NAWATAKIA SIKU NJEMA NA BARAKA ZA BWANA ZIWE JUU YENU.

Ev:  Eliezer Mwangosi.

0755808077 & 0652571733

Kwa masomo zaidi fungua mitandao ifuatayo: http://emwangosi.blogspot.com/ (Vijana) http://kayanafamilia.blogspot.com/ (Ndoa) http://matengenezo.blogspot.com/ (Ujumbe wa Matengenezo)

MASWALI JUU YA TOFAUTI ZA IMANI

UTATA KATIKA TOFAUTI ZA DINI NA MADHEHEBU

1.      Kwa nini kuna Migawanyiko ya dini na Madhebu? Je ni Mpango wa mungu?

Sio mpango wa Mungu neno linasema “Bwana mmoja, Imani moja, Ubatizo mmoja” Efeso 4:5.  Hivyo ni kutimiza unabii wa biblia unaosema; “Maana utakuja wakati watakapoyakataa mafundisho yenye uzima; ila kwa kuzifuata nia zao wenyewe, watajipatia waalimu makundi makundi, kwa kuwa wanamasikio ya utafiti; nao watajiepusha wasisikie yaliyo kweli, na kuzigeukia hadithi za Uongo” 2Timotheo 4:3-4.

Na Yesu alitoa tahadhari akisema “Jihadharini na manabii wa uongo, watu wanaowajia wamevaa mavazi ya kondoo, walakini kwa ndani ni mbwa mwitu wakali … Si kila mtu aniambiaye, Bwana , Bwana, atakayeingia katika ufalme wa mbinguni; bali ni yeye afanyaye mapenzi ya Baba yangu aliye mbinguni. Wengi wataniambia siku ile, Bwana, Bwana hatukufanya unabii kwa jina lako, na kwa jina lako kutoa pepo, na kwa jina lako kufanya miujiza mingi? Ndipo nitawaambia dhahiri, sikuwajua ninyi kamwe; ondokeni kwangu, ninyi mtendao maovu” Mathayo 7:15-23, Mathayo 24:24-25.

Migawanyiko hii ilianza kutokea, mara tu baada ya Kanisa la Mitume kuhujumiwa na utawala wa Dola ya Kirumi, na kuanza kuingiza Mafundisho tofauti na biblia na kuamua kufanya marekebisho kwenye Amri za Mungu. Jambo hili lilitabiriwa na nabii Daniel “Naye atanena  maneno kinyume chake aliye juu, naye atawadhoofisha watakatifu wake aliye juu, naye ataazimu kubadiri majira na Sheria …” Danilel 7:25, Pia Isaya alionyeshwa Dunia yetu ikiingia katika laana kwa sababu ya Uasi wa Sheria “Tena Dunia imetiwa unajisi kwa watu wanaoikaa; kwa maana wameziasi Sheria, wameibadiri Amri, wamelivunja Agano la Milele” Isaya 24:4-6.

2.     Mbona kila Dhehebu au Dini wanaomba na Mungu anawasikia na kuwajbu?

Mambo yafuatayo tunatakiwa kuyafahamu Juu ya Ibada na kujibiwa Maombi:

-          Wachanga kiroho au wasiojua ukweli, wanapata Rehema ya Mungu, akiwasikia na kuwatendea sawaswa na ujuzi walionao, ili mradi waanamwamini Yesu. Yesu ataendelea kuwafunulia ukweli ili waweze kuukulia wokovu na kuwa wakamilifu.  Hivyo ukiona kuna ukweli wa biblia uliotofauti na kile unachokiamini, amua kuifuata Biblia utakuwa salama.

-          Watu waliofunuliwa ukweli lakini wakaamua, kuendelea kushika mafundisho yaliyo maagizo ya wanadamu, Mungu anawaacha na Adui Shetani anaaza kuwahudumia, akiwapatia kila wanachoomba. Wao watafikiri Baraka zinatoka kwa Mungu kumbe zinatoka kwa baba yao Ibilisi. Utashangaa Mtumishi ni Shoga, au mzinzi, muuza madawa la kulevya n.k. Huku ana upako wa ajabu, miujiza ya Baraka na uponyaji ndio nyumbani, tena kwa jina la Yesu. Hizo ndizo hila za shetani kwa siku za mwisho kama Yesu alivyotuonya kujihadhari.

3.      Mbona miaka na miaka Madhehebu tofauti yapo na yanaendelea kwa Mafanikio?  

Yesu hakusema atayaondoa, alisema,  siku ya mwisho mwisho ndipo atawaambia “SIKUWAJUA NINYI KAMWE ONDOKENI KWANGU”, bila kujali  kanisa au dini ina washiriki wangapi duniani, kama hawatii kweli ya Biblia watakwenda motoni.  Wengi wanaangalia wingi wa watu na kurithi Dini za wazazi hata kama wanaasi Sheria za mungu, hiyo ni HATARI.

4.     Kwani Dini au Dhehebu litampeleka Mtu Mbinguni?

Dini au Dhehebu halimpeleki mtu Mbinguni, bali kinachoangaliwa ni kwamba unafundishwa nini na unachukuwa uamuzi gani kwa kile unachofundishwa. Kila Dhehebu au Dini lina viongozi ambao ndio waalimu, siku hizi wanajiita manabii, Mitume, Ma baba watakatifu, Wachungaji n.k. Hatari nyingine ni hii, unaweza kuwa na katika kanisa linalofundisha kweli ya mungu, lakini usipoamua kuishi sawasawa na neno, vilevile utaangamia.

5.     Mungu ana mpango gani na watu waaminifu lakini hawaujui ukweli?

Historia inajirudia, kama ilivyokuwa wakati wa Nuhu, wakati wa Sodoma na Gomola, wakati wa Eliya, wakati Yohana Mbatizaji, Mungu hakufanya hukumu bila kutuma ujumbe wa Onyo na Matengenezo. Waliokubali kuachana na mapokeo ya viongozi wa Dini waliokolewa, hata sasa Mungu ametuma tena ujumbe wa Matengenezo kwa watu wote, kuanzia Viongozi hadi waumini wa Dini na Madhehebu mbali mbali. Anasema “Sauti ya mtu aliaye nyikani, itengenezeni, njia ya Bwana, yanyosheni Mapito yake” Mathayo 3:3, na pia Mungu anasema “Mcheni Mungu na kumtukuza kwa maana saa ya hukumu yake imekuja, Msujidieni yeye aliyezifanya mbingu na nchi na bahari na chemichemi za maji” Ufunuo 14:7. Na mwisho anasema “Tokeni kwake enyi watu wangu, msishiriki dhambi zake, wala msipokee mapigo yake” Ufunuo 18:4. Ni wakati wa kujiokoa nafsi, bila kujali wachungaji wala wazazi, kwani kila mtu atabeba furushi lake mwenyewe.

6.     Nikitaka leo kuamua kuishi maisha matakatifu nifanyeje?

-          Mwamini yesu kuwa Bwana na Mwokozi wa maisha yako, kubali kuwa wewe kwa nguvu zako huwezi kushinda dhambi, hivyo omba uwezo kutoka kwa Mungu wa kushinda dhambi. Ungama na tubu dhambi kwa kumaanisha kuziacha.

-          Amua kujifunza na kutii Sheria za Mungu kama zilivyoandikwa na Mungu mwenyewe, ili udumu kuwa safi kwa neema ya Yesu.

-          Jenga tabia ya kuukulia wokovu kwa Maombi, kusoma neno lake na kuhudhuria Ibada , pamoja na kuwashudua wengine juu ya Neema ya yesu Kristo inavyoweza kuokoa.

TUNAPASWA KUSIMAMA KATIKA UKWELI KABLA YA MAJINA YETU KIPITA KWENYE KITI CHA HUKUMU.

Ev. Eliezer Mwangosi

MASWALI JUU YA NEEMA NA DHAMBI

MASWALI JUU YA NEEMA NA USHINDI WA DHAMBI

1.      Ninawezaje kuwa Mtoto wa Mungu?

Kwa kumpokea Yesu Kristo kuwa Bwana na Mwokozi wako “Bali wote wliompokea aliwapa uwezo wa kufanyika watoto wa Mungu , ndio wale waliaminio jina lake”  Yohana 1:12, “Kila mtu aliyezaliwa na Mungu hatendi dhambi, kwa sababu uzao wake wakaa ndani yake; wala hawezi kutenda dhambi kwa sababu amezaliwa kutokana na Mungu”  1Yohana 3:9-10. “Kwa kuwa wote wanaoongozwa na Roho wa Mungu, hao ndio wana wa Mungu .

2.      NEEMA ni nini? Na ina kazi gani katika maisha Mtu?

Tendo la Mungu kutuokoa kutoka dhambini bure, kwa kutulipia gharama ya Mauti ya milele tuliyopaswa kulipa kutokana na kutenda Dhambi. Kwa njia ya Kifo cha Yesu pale msalabani, kila anayeamini, kutubu na  kuungama Dhambi, anapata wokovu bure. Ndani ya NEEMA kuna mambo yafuatayo: (i)Tunapata msamaha wa dhambi Bure, (ii) Tunahesabiwa haki ya kuwa watoto wa Mungu, (iii) Tunapewa uwezo wa kushinda Dhambi, kwa njia ya Roho mtakatifu.

3.      Dhambi  ni nini?

“Atendaye dhambi afanya uasi, kwa kuwa dhambi ni UASI  (juu ya Sheria za Mungu)“  1Yohana 3:4, Mtume Paulo amefafanua zaidi juu ya Kazi ya Sheria kuwa ni kuonyesha Dhambi, na pasipo sheria hakuna Dhambi au kosa. Warumi 4:15, Warumi 7:7-8. Yesu alisisitiza akisema “… Ukitaka kuingia katika Uzima, zishike AMRI” Mathayo 19:16-19, pia soma Mathayo 5:17-19, Marko 7:6-9.

4.       Dhambi ilianzia wapi?

Kwa mara ya Kwanza Dhambi (Uovu) ilianzia Mbinguni katika Moyo wa Malaika aliyekuwa anaitwa Lusifa ambaye anaitwa SHETANI.  Ezekiel 28:15 “Ulikuwa mkamilifu katika njia zako tangu siku ile ulipoumbwa, hata uovu ulipoonekana ndani yako” soma pia Ezekiel 28:13-17, Isaya 14:13-14. Baada ya uovu kuingia kwa Shetani, Mungu akanfukuza mbinguni, akaanzisha vita akiungana na malaika theluthi moja waliokuwa wanamfuata. Ufunuo 12:4, 7-12.

5.      Dhambi  ilianza lini kwa mwanadamu?

Baada ya Shetani kufukuzwa mbinguni ndipo akashuka kuwadanganya Wazee wetu Adam na Hawa kuasi maagizo ya Mungu, na baadaye tunaona Mungu anamlaani Kaini kwa dhambi ya Kumuua Ndugu yake Habili, hadi tunaona Kizazi cha Nuhu Kinaangamizwa kwa Dhambi za Uasherati n.k. soma: Mwanzo 3:1-19 Anguko la Adamu, Mwanzo 4:6-11 Dhambi ya Kaini kumuua Habili, Mwanzo 6:1-8 Dhambi wakati wa nuhu.

6.      Amri za Mungu zilitolewa lini?

Wengi wanaamini Amri za Mungu zilitolewa katika mlima Sinai kupitia kwa Musa, na ndio maana wangi wanasema Amri kumi au Sheria za mungu ni kwa ajili ya Wayahudi.  Ukweli ni huu; Dambi ni UASI juu ya Mapenzi au Tabia ya Mungu,  hivyo  Amri Kumi alizopewa Musa na Mungu zilikuwa ni muhutasari wa Mapenzi yake ili kusaidia Kizazi kilichosahau Maagizo ya Mungu baada ya kukaa utumwani  Misri kwa muda mrefu bila kufanya IBADA kwa mungu wao.  Yesu alisisitiza watu Kushika Amri za Mungu, kama Mungu mwenyewe alivyoziandika:  Kutoka 20:3-17, ili tusihesabiwe kuwa waasi wa Mapenzi ya Mungu.

7.      Yesu alitoa Amri mpya ya Upendo, una uhusiano gani na Amri za Mungu?

Kwa ujumla Amri za Mungu zinawakilisha Tabia ya Mungu ambayo ni Upendo – Yaani kumpenda Mungu na Mwnadamu mwenzio. Na tabia ya Mungu haibadiliki hivyo hata Amri zake hazibadiliki, Yesu hakuja kubadili Amri bali kuzitimiliza, wayahudi walishika Amri kumi kibinadamu, sio kama tabia ya Mungu ya Upendo ilivyo. Na ndiyo maana Mungu alisema, Sheria zake zitaandikwa katika mioyo yetu kwa njia ya Roho mtakatifu - Ebrania 10:16, maana yake Tunapewa tabia ya Mungu, inayoonekana kwa matendo. Huko ndiko kuzaliwa mara ya Pili.

8.      Biblia inasema Kristo ni mwisho wa SHERIA, hii ina maana gani? Biblia inajipinga?

Ukisoma Warumi 10:4, Galatia 4:4-5, Galatia 3:23-25, Galatia 5:2-5, Kolosai 2:16-17 n.k. utaona mtume Paulo anapiga vita kuwa chini ya Sheria au Kushika Sheria, hii ina maana gani? Kwenye biblia, kuna sheria za aina nyingi, kuna AMRI kumi ambazo zinawakilisha Tabia au Mapenzi ya Mungu, hizi zipo wakati wote ambao Mungu yupo, pia kuna sheria zingine nyingi ambazo Mungu alizitoa zikilenga kifo cha Yesu. Mfano; Sheria za Kafara, Tohara, na maadhimisho mengine yaliyoambatana na sikukuu za upatanisho, pia kulikuwa na sheria ja kijamii – Mtu akizini apigwe mawe hadi kufa, ili waiogope zinaa n.k. Sheria hizo zote ziliisha baada ya wokovu kamili kukamilika kupiti kifo cha Yesu msalabani. Kwa ufafanuzi zaidi soma somo linalosema “SHERIA ZILIZOISHIA MSALABANI”.

9.      Tunahesabiwa haki kwa matendo ya  Sheria au kwa Imani?

Biblia inasema tunahesabiwa haki kwa Imani, Wagalatia 3:26-27 “Kwa kuwa ninyi nyote mmekuwa wana wa Mungu kwa njia ya imani, katika Kristo Yesu. Maana ninyi nyote mliobatizwa katika Kristo mmemvaa Kristo”.  Yesu alisema wazi kuwa pasipo yeye hatuwezi kutenda mapenzi ya Mungu (Hatuwezi kushinda Dhambi/kushika Amri), maana yake ni hii, kwa kumwamini Yesu Kristo, yeye anatuapatia Roho mtakatifu ambaye anatuvisha tabia ya Mungu ya Upendo. Hivyo tabia ya Upendo (Maisha bila dhambi) inakuwa ni tabia yetu. Haki kwa matendo ya Sheria ni kujitahidi kushika Amri au Sheria za Mungu kwa nguvu zetu kama walivyokuwa Mayahudi. Wanadai sio wauaji huku Hasira, Chuki na Visasi vimejaa mioyoni mwao – Hizo ni tabia za Mwili au Ibilisi. Pia hatuhesabiwi haki tena kwa Tohara na Kuchinja wanyama wa Kafara, kwani Yesu Kristo alishatulipia Deni kwa damu ya thamani.

ZINGATIA:

Sheria au Amri za Mungu

 Hazimuokoi mwanadamu, zipo kama kioo kinachoonyesha uchafu, lakini kioo hakiwezi kutumika kusafisha uchafu, mpaka yatumike Maji.

Neema

 Ndiyo pekee inayoweza kutuokoa, tukisamehewa dhambi na kutusafisha udhalimu wote kwa damu ya Yesu Kristo, hatimaye kutupatia ushindi wa kuishi bila Mawaa mbele za mungu.

HILA ZA SHETANI:

Nabii yohana alionyeshwa mwisho wa vita kati ya Mungu na Shetani ikiwa ni juu ya Kanisa la Mungu linalotii Sheria za Mungu na Imani ya Yesu.  “JOKA akamkasirikia yule mwanamke, akaenda zake afanye VITA juu ya wazao wake waliosalia, wazishikao AMRI za Mungu, na kuwa na ushuhuda wa YESU;  akasimama juu ya mchanga wa bahari“ Ufunuo 12:17. Yesu akasema “Hapa ndipo penye subira ya watakatifu hao wazishikao AMRI za Mungu na IMANI ya Yesu” Ufunuo 14:12.

 

Vita kati ya Mungu na Shetani ni juu ya SHERIA ZA MUNGU, shetani anakataa kumtii Mungu akidai na yeye kuwa ni sawa na Mungu. Wakati wote anasimama kupinga Sheria za Mungu na kuwafanya wanadamu wote wasimtii Mungu, kwa kupotosha au kubadili Amri za Mungu.  Viongozi wengi wa Dini wamedanganywa na kuongozwa kujenga chuki juu ya Sheria za Mungu. Neno la Mungu linasema “Yeye asemaye, nimemjua, wala hazishiki Amri zake ni Mwongo, wala kweli haimo ndani yake” 1Yohana 2:4, “Wokovu umbali na wasio haki, kwa maana hawajifunzi AMRI zako” Zaburi 119:155.

UNAALIKWA KUJIUNGA NA KUNDI LITALOSIMAMA UPANDE WA MUNGU KATIKA VITA KUU ILIYO MBELE YETU, TUNAPOFUNGA HISTORIA YA DUNIA HII.

Ev: Eliezer Mwangosi